دەمەکە بزاڤێن فرۆتنا سلێمانیێ دەستپێکرین
ئەندامەکێ سەرکردایەتیا پارتی دیموکراتی کوردستان راگەھاند، بزاڤێن فرۆتنا سلێمانیێ یێن دەستپێکرین و مانشێتێن دوھی یێن رۆژناما فەرمی یا حوکمەتا عیراقێ دیاردکەت کو ھێشتا پیلانا ١٦ ئوکتۆبەرێ یا بەردەوامە.
د ھژمارا دوھی ١/٢/٢٠٢١ یا رۆژناما (الێباح) یا فەرمی یا عیراقی ل سەر زارێ (رێکەوت زەکی) ئەندامێ فراکسیۆنا ئێکەتی نیشتمانی کوردستان ل جڤاتا پارێزگەھا سلێمانیێ ھاتە ئاشکراکرن کو بزاڤەک یا ھەی بۆ وێ چەندێ ئەگەر ھەولێر و بەغدا نەگەھنە رێککەفتنێ، مادەک د قانوونا بودجا عیراقێ بۆ سالا ٢٠٢١ بھێتە جھگیرکرن تاکو پارێزگەھا سلێمانیێ راستەوخوە رەفتارێ ل گەل بەغدا بکەت.
ل دۆر ڤێ چەندێ، نەجات حەسەن، ئەندامێ سەرکردایەتیا پارتی گۆت” ئەڤ بابەتێ رۆژناما (الێباح) یێ نوو نینە، چونکی ئەڤە بۆ بەری ١٦ ئۆکتوبەری دزڤریت و ئەڤ رێککەفتنە ھاتیە کرن بۆ رادەستکرنا کەرکووکێ و دەڤەرێن دی یێن کوردستانێ و ئەڤە بریارا سیاسیێن پشکەکا زۆنا کەسکە، د دەمەکی دا زیانەکا گشتی یە بۆ کوردستانێ”.
نەجات حەسەن رۆھنکر ژی” ل عیراقێ دستوورەک یێ ھەی ئەگەر نەھێنە پێشیل کرن، ئەو دستوورە دشێت چارەسەریا گرفتان دناڤبەرا بەغدا و ھەولێرێ دا بکەت” دیارکر ژی” بەغدا یا بەرپرسیارە و یا کەفتیە بن کارتێکرنا کۆتلان، جڤاتا نوونەران نەشێت بریارێن باش بدەت، بەلێ د بەرامبەر دا فاکتەرێن خێرێ ل کوردستانێ گەلەکن، رێ نادەن ئەو پیلانا ل زۆنا کەسک سەر بگریت”.
وی سەرکردێ پارتی ئاماژە کر”ئەوا دھێتە کرن فرۆتنا سلێمانیێ یە و رادەستکرنا وێ یە ب بەغدا، یا گرنگە حوکمەت بھێتە سەر خەت و رێ ل وێ پیلانێ بگریت، حوکمەتا ھەرێمێ بزاڤ بۆ چاکسازیێ ودابینکرنا مووچەی ئەنجام داینە، دڤێت پشتەڤانیا حوکمەتێ بکەین و ھزر د وێ چەندێ دا بکەین کو ئەڤ وەلاتە نەھێتە پارچەکرن”.
