داعش و زیندانا گوێڕانێ …

ده‌ست بسه‌رداگرتنا زیندانا گوێڕانێ ل حه‌سه‌كه‌ ژ لایێ داعشێ , به‌رژه‌نگێن قۆناغه‌كا بڤه‌یه‌ بۆ داهاتی . پێدڤییه‌ ده‌زگه‌هێن ته‌ناهیێ و هێزێن پێشمه‌رگه‌ی ب هشیارییه‌كا زێده‌تر ئه‌ركێ خۆ ببینن .ئه‌و تیرۆریستێن كۆ ژ زیندانێ ره‌ڤینه‌ دێ به‌رێ خۆ ده‌نه‌ عێراقێ و خۆ رێكئێخنه‌ڤه‌ و دێ ده‌ست ب كریارێن تیرۆریستی كه‌ن . هه‌روه‌سا شیمانا( ئیحتمال ) ئه‌نجامدانا كریاره‌كا ب ڤی ره‌نگی و شكاندنا زیندانێ ل عێراقێ ژی هه‌یه‌ .ئه‌ڤه‌ ژی ره‌نگه‌ هاریكار بیت كو ملیشیایێن شیعه‌ و حه‌شدا شه‌عبی هێشتا بهێزتر ببن ب هێجه‌تا شه‌ڕێ دژی داعشێ .هه‌روه‌سا به‌لكو بكه‌نه‌ هێجه‌ته‌ك كو پڕۆسێسا سیاسی ژی راوه‌ستینن .ئه‌گه‌ر ئه‌ڤ بوویه‌ره‌ ل باشورێ كوردستانێ روودابا , نهۆ هه‌موو ده‌زگه‌هێن میدیاییێن پ ك ك دا تلیلیان ڤه‌ده‌ن . سه‌ره‌ڕای كاره‌ساتێ دا هه‌وڵ ده‌ن خه‌لك و شه‌قام ژی بكه‌ڤنه‌ دژی حكومه‌تا هه‌رێما كوردستانێ و كاره‌ساتێ هێژ مه‌زنتر لێ بكه‌ن . بناڤ رۆشنبیرێن ساخته‌چی دا هزاران شرۆڤه‌یان دژی حكومه‌تا هه‌رێمێ پێشكه‌ش كه‌ن و شه‌قامی هان ده‌ن . دا مانگرتن و خۆنیشاندانان سازكه‌ن .