بەرپرسێ لقێ ۸ێ پارتی: ڤەکرنا ئوتێل و مۆتێلێن گەشتیاری دەلیڤەیا کاری بۆ گەنجێن زاخۆ پەیدا دکەت
لژێر چاڤدێریا بەرێز عومەر ئۆرەیی بەرپرسێ لقێ ۸ێ پارتی دیموکراتی کوردستان و ب هەڤالینیا شاندەکێ کارگێریا لقێ ۸ێ پارتی ل زاخۆ، ئۆتێل و مۆتێل و خارنگەهەکا گەشتیاری ل زاخۆ هاتە ڤەکرن و بەرپرسێ لقێ ۸ خۆیاکر کو ڤەکرنا ئوتێل و مۆتێلێن گەشتیاری دێ دەلیڤەیا باش یا کاری بۆ خەلکێ زاخۆ پەیدا دکەت و پشتەڤانیا خوە دیارکر کو هەر پرۆژەیەکێ ببیتە ئەگەرێ پەیداکرنا دەلیڤا کاری بۆ گەنجێن زاخۆ دێ ب جددی پشتەڤانیێ لێ کەین و کادرێن مە یێن ئیداری ژی ل سنۆرێ ئیدارا سەربەخۆیا زاخۆ ل گۆرەی بەرنامەیێ پارتی بۆ خزمەتا گشتی د کابینەیا حکۆمەتێ دا؛ د بابەتێ وەبەرهینان و کەرتێ گەشتیاری دا پشتەڤان و هاریکارن دگەل وەبەرهێنەران و ئەڤە ژی جهێ دەستخۆشیێ یە.
بەرێز عومەر ئۆرەیی د ئاخفتنا خوە دا ل رێورەسمێن ڤەکرنا پرۆژەیێ گەشتیاری دا دیارکر کو ل سنۆرێ ئیدارا سەربەخۆیا زاخۆ د نوکە دا نزیک ۲۳ ئۆتێل و مۆتێلان هەنە و هەر ژ باتیفا هەتا زاخۆ خزمەتەکا جوان د ڤی واری دا پێشکێشی گەشتیاران دهێتە کرن و گۆتژی؛ بۆ ئێکەم جار ئۆتێلا خابوور ل سالا ۱۹٤٦ێ ل زاخۆ هاتیە ڤەکرن، و خۆشبەختانە هەتا نوکە رێژەیەکا باش یا ئوتێل و مۆتێلان هەیە و بوویە ئەگەرێ پەیدابوونا ب دەهان دەلیڤێن کاری بۆ گەنجێن دەڤەرێ و زێدەباری کارتێکرنێ ل سەر پێشڤەچوونا کەرتێ گەشتیاری و سەنگ و ناڤ و دەنگیا باژێری و پەیدابوونا پرۆژەیێن وەبەرهینانێ و پەیدابوونا تێکەلیێن بازرگانی و کلتوری دناڤبەرا وەلاتێن بیانی و هەرێمێ دا دکەت.
