مه‌كته‌با سیاسییا پارتى ل دۆر پرۆژه یاسایا بودجه‌یێ عێراقێ راگه‌هاندنه‌ك بەلاڤکر
مه‌كته‌با سیاسییا پارتى دیموكراتى كوردستان راگه‌هاند، پارتی گه‌له‌ك ب رژدى بزاڤكرن ئه‌و پیلانا كو ب شێوه‌یه‌كێ رێكخستى بۆ ده‌ستێوه‌ردانێ ل سه‌روه‌رییا هه‌رێمێ و بچووككرن و تێكدانا قه‌واره‌یێ هه‌رێمێ و كێمكرنا ده‌ستهه‌لاتێن وێ یێن ده‌ستوورى كه‌ڤتییه د رێكێدا، ژناڤببه‌ت.
ده‌قێ راگه‌هاندنا پارتى دیموكراتى كوردستان:
راگه‌هاندنه‌ك ژ مه‌كته‌با سیاسییا پارتى دیموكراتى كوردستان
پارتییا مه د ره‌وانگه‌ها هه‌ستكرن ب به‌رپرسیارییه‌تیێ به‌رامبه‌ر ژیانا وه‌لاتییێن كوردستانێ گه‌له‌ك بزاڤكرن كو مادده و برگه‌یێن قانوونا بودجه‌ى یا سالا 2023ێ یا عێراقا فیدرال ل دووڤ ئیستیحقاقاتێن ده‌ستوورى و رێككه‌فتنا ئیداره‌یا ده‌وله‌تێ بۆ پێكئینانا كابینه‌یێ و رێككه‌فتنا حكومه‌تا هه‌رێمێ و حكومه‌تا فیدرال بن، شایسته‌یێن دارایى بۆ حكومه‌تا هه‌رێمێ دابین بكه‌ت.
ژلایه‌كێ دیڤه گه‌له‌ك ب رژدى بزاڤكرن ئه‌و پیلانێن كو ب شێوه‌یه‌كێ رێكخستى د رێكێدابوون بۆ ده‌ستێوه‌ردانێ ل سه‌روه‌رییا هه‌رێمێ و بچووككرن و تێكدانا قه‌واره‌یێ هه‌رێمێ و كێمكرنا ده‌ستهه‌لاتێن وێ یێن د ده‌ستووریدا هاتینه جهگیركرن، ژناڤببه‌ت.
سه‌ربارى هندێ كو هه‌موو تموحاتێن مه د بودجه‌یدا نه‌هاتن ژبه‌ركو دڤیابا ئه‌و ده‌قه‌یێ بودجه‌ى یێ كو د جڤاتا وه‌زیرێن فیدرالدا بریار ل سه‌ر هاتییه دان، ده‌ستكارى تێدا نه‌هاتباكرن، لێ ژ پێخه‌مه‌ت ده‌ستكاریكرنا حكومه‌تێ بۆ بابه‌تێن مووچه‌ی و به‌رده‌وامییا وه‌به‌رهێنانێ، به‌رده‌وام نه‌بوونا ئاریشه‌یان، مه بریاردا دەنگ ب په‌سه‌ندكرنا بودجه‌ى بهێته‌دان.
ل ڤێرێ یا ژ هه‌ژییه سوپاسییا هه‌ڤالێن فراكسیۆنا پارتییا خوه ل جڤاتا نوونه‌رێن عێراقێ و كوتله‌یا خوه یا وه‌زارى ل حكومه‌تا فیدرال بكه‌ین كو ب دلسوزى رۆلێ خوه دیتن، داخوازا سه‌ركه‌فتنێ بۆ دكه‌ین.
مه‌كته‌با سیاسى
پارتى دیموكراتى كوردستان
11ى خزیرانا 2023ێ
