لقێ ٨ێ پارتی، کورنیشێ دەلال ل خەلکێ زاخۆ پیرۆز دکەت
زاخۆ، ژ هەمی روویەکێ ڤە ئێک ژ جوانترین باژێڕێن هەرێما کوردستانێ یە، لەورا گرنگیدان ب ڤی باژێری ژ هەمی روویەکێڤە ژ لایێ بەرێز مەسرور بارزانی سەرۆکێ حکۆمەتا هەرێما کوردستانێ، شانازییەکا مەزنە بۆ خەلکێ دەڤەرێ و بۆ مە وەکو پارتی دیموکراتی کوردستان.
گەلەک پرۆژەیێن ستراتیژی نوکە د وارێ جێ بەجێ کرنێ دانە، ئێک ژ وان پرۆژەیان ژی پرۆژەیێ کورنیشێ دەلالە کو هەردوو لایێن پرا دەلال دێ بیتە جهێ پەیادە و هاتن و چوونا گەشتیاران بۆ هندێ جوانیا پرێ و خابیرێ زاخۆ ژ نزیک بهێتە دیتن. ژبەر ڤێ چەندێ دەستخۆشیێ ل بەرێز گوهدار شێخۆ سەرپەرشتێ ئیدارا سەربەخۆیا زاخۆ و بەرێز موشیر محمد بشیر قایمەقامێ قەزا ناڤەندیا زاخۆ و بەرێز چیا ئەمین رێڤەبەرێ گەشتوگۆزارا زاخۆ دکین کو شەڤ و رۆژ چاڤدێرییەکا نزیک ل ڤان پرۆژەیێن ستراتیژی دکن.
مە و خەلکێ مە یێ خۆشتڤی، باوەرییەکا موکوم هەیە کو کادرێن مە یێن ئیداری ل دەڤەرێ خزمەتەکا بەردەوام و ژ هەژی پێشکێشی خەلکێ مە یێ زاخۆیا شەهیدان دکت، ژبەرکو زاخۆ باژێرەکە قوربانیێن زۆر بۆ کورد و کوردستانێ داینە لەورا ژ هەژی هەر خزمەتەکێ یە و ئەم پارتی خزمەتکرنا خەلکێ خوە ب ئەرک دزانین و مزگینیێ ددەین ژی ل دەمەک نزیک ئەڤ پرۆژەیێن ستراتیژی بکەڤنە د خزمەتا خەلکێ و گەشتیاران دا و کورنیشێ دەلال ل خەلکێ خوە یێ خۆشتڤی پیرۆز دکین.
لقێ ٨/ زاخۆ
پارتی دیموکراتی کوردستان
١١ی خزیرانا ٢٠٢٣ێ
